Kiko ta maltrato di mucha i kiko ta violensia relashonal? Dependé di e informashon atkerí i eksperiensianan propio hendenan por tin un otro bista di esaki. Pa por apliká e Kódigo di Protekshon bon e ta importante pa tur hende usa e mesun definishonnan.
Maltrato di mucha
Maltrato di mucha ta tur forma di interakshon menasante òf violento, físiko, síkiko òf seksual pa ku un menor di edat, ku mayornan òf otro personanan di kua e menor di edat ta den un relashon di dependensia òf pa falta di libertat, imponé aktivo òf pasivo, ku konsekuensia ku daño sevéro ta wòrdu okashoná òf e menasa ku daño ta wòrdu okashoná na e menor di edat den forma di leshon/daño físiko òf síkiko.
Fuente: Maduro, E. (2015) Maltrato di mucha mundial i na Kòrsou. Den CBS Modus Statistisch Magazine Curaçao
Tin diferente forma di maltrato di mucha: maltrato físiko, emoshonal i seksual. Tin ora ta trata di un kombinashon di diferente formanan. Ta testigu di violensia (relashonal), negligensia físiko òf emoshonal tambe ta wòrdu konsiderá komo formanan di maltrato di mucha.
Fuente: Nederlands Jeugdinstituut. Dossier Kindermishandeling
Violensia relashonal
u e término violensia relashonal ta wòrdu aklará ku e violensia no únikamente ta tuma lugá den un kas. Ta trata di violensia ku ta wòrdu kometé dor di un persona ku ta den e famia di- òf den un relashon amoroso ku e víktima, independientemente e lugá kaminda e violensia wòrdu kometé.
Ora ta trata di violensia relashonal mayoria biaha ta trata di violensia físiko i/òf seksual ku òf sin daño na materialnan, kaminda e sospechoso i e víktima ta famia biológiko- i/òf pa medio di matrimonio òf tin un relashon amoroso ku otro (pafó di e matrimonio) òf tin/tabatin un relashon amoroso ku un persona ku ya ta den un matrimonio i/òf ta amigu-/amiganan (di kas) di otro. Einan ta trata di hòmbernan, muhénan, menornan di edat i/òf adultonan ku por ta víktima òf sospechoso di violensia den e esfera relashonal. Maltrato di mucha, maltrato di pareha i maltrato di adulto ta formanan di violensia relashonal.