E sinku pasonan di e
Kódigo di Protekshon

E Kódigo di Protekshon ta konta pa tur profeshonal na Kòrsou ku ta traha ku muchanan òf famianan.
E ta duna direkshon ora ta señalá maltrato di mucha i violensia relashonal. Un deskripshon general.

E Kódigo di Protekshon ta relevante pa tur profeshonal na Kòrsou ku ta traha den trabou sosial, enseñansa, salubridat i seguridat. Ku esaki ta wòrdu palabrá kon profeshonalnan por señalá maltrato di mucha i violensia relashonal i siguidamente kua pasonan nan mester tuma pa prevení òf stòp situashonnan insigur. E Kódigo di Protekshon ta konsistí di sinku paso.

  • 1. Traha un lista di e señalnan i wak tambe kiko ta bai bon

    Skirbi loke bo ta mira i tende, no husga ni saka niun konklushon ainda. Ora bo ta traha ku adultonan, kòrda tambe pa chèk e mucha. (Esaki ta nifiká ku serka adultonan ku problemanan síkiko severo, adikshon òf un pareha violento, chèk si e ta responsabel pa e kuido di muchanan menor di edat i/òf si nan ta seif kaminda nan ta wòrdu kriá.)

  • 2. Pidi konseho na un kolega òf un eksperto

    Konsultá un kolega, e supervisor di kódigo*, òf pidi konseho serka e punto di konseho- i notifikashon ProtehaMi**. Por ehèmpel kon bo por identifiká e señalnan òf tokante e aserkamentu di e kombersashon na paso 3. Bo ta pidi konseho a base di informashonnan anónimo di e kliente òf pashènt. Nota tur kos den un arkivo.

  • 3: Hiba un kombersashon ku esnan enbolbí

    Kombersá tokante di bo prekupashonnan i kombersá tokante di loke segun bo ta bai bon. Pidi nan pa un reakshon i kombersá tokante di esei. Palabrá kon mester sigui. Nota den bo arkivo ku ken bo a papia i kua palabrashonnan a wòrdu hasí. Den kaso di maltrato di mucha: kombersá ku e muchanan tambe. Sea alerta: e úniko manera pa salta e kombersashon ku esnan direktamente enbolbí ta si bo tin indikashonnan ku si bo hiba e kombersashon aki lo surgi riesgonan di seguridat pa esnan direktamente enbolbí òf pa bo mes. Den e kaso ei semper pidi konseho na ProtehaMi.

  • 4. Pisa e maltrato di mucha i/òf violensia relashonal

    Kompilá tur informashon: e señalnan, e konsulta ku koleganan, e kombersashon ku esnan enbolbí i eventual e konseho di un supervisor di kódigo òf ProtehaMi. Hasi un kalkulashon di e grado i gravedat di e situashon: kon grandi e riesgo di inseguridat ta aktualmente òf den futuro pa e mucha? Tambe por ta posibel ku no tin nada ta pasando òf ku algo otro ta pasando. Den e kaso ei e kódigo di protekshon por wòrdu será. Si akaso bo ta duda: pidi (atrobe) konseho di e supervisor di kódigo òf di ProtehaMi.

  • 5. Desishon, ora ku e seguridat ta na peliger: ayudo ta posibel? Is melden nodig?

    Notifikashon ta nesesario? Si ta posibel bo mes ta yuda, òf organisá esaki. Si akaso bo mes no por yuda òf no por organisá esaki, bo ta hasi un notifikashon na ProtehaMi. Den e kaso ei ProtehaMi ta tuma e kaso over.

*Supervisornan di kódigo ta personanan apuntá den organisashonnan i profeshonalnan ku ta eksperto riba e temanan maltrato di mucha i violensia relashonal. Nan ta sostené koleganan den vèlt ora ta trata (di sospecho) di maltrato di mucha i violensia relashonal den ehekutashon di e pasonan di e Kódigo.

** ProtehaMi ta un punto di konseho i notifikashon maltrato di mucha i violensia relashonal na Kòrsou i ta forma parti di e Uitvoeringsorganisatie Justitiele Zorg (JZ). Bo por akudí komo profeshonal i komo siudadano di Kòrsou ora ku bo ta prekupá pa e seguridat di un mucha òf adulto. ProtehaMi ta duna informashon i konseho riba e tereno di maltrato di mucha, violensia relashonal i aplikashon di e Kódigo di Protekshon i ta investigá notifikashonnan di ámbos profeshonalnan i siudadanonan.